TITU No’kis filialında tarawg’a tiyisli rawajlang’an sho’lkemler, kompaniyalar ha’m joqarı oqıw orınları menen birge islesiw jaqsı jolg’a qoyılg’an. Ma’kset student jaslardıӊ zamanago’y bilim iyelewi ushın elede qolay sha’ra’yatlar jaratıw, du’nyadag’ı rawajlangan universitetler ta’jiriybelerin almasıw sanaladı.
TITU No’kis filialında Opavadag’ı Sileziya universiteti doktarantı Tursınbay Uteev fizika pa’ninen inglis tilinde student jaslarg’a ta’lim bermekte.
-«Bu’gingi zaman jasları shet tillerin jaqsı biliwi ha’m o’z taӊlag’an bag’darı boyınsha tolıq bilimge iye bolıwı lazım. Bunıӊ ushın studentler 1-kursınan baslap,o’z qa’lewi tiykarında ilimiy jumısın taӊlap tikkeley sol boyınsha pukta jumıs alıp barıwı kerek. Sonday-aq, ilimiy jumısı boyınsha jeke ta’rizde oylap tapqan ideyaların jaӊalıqların seminar-treningler arqalı basqalarg’a tu’sindirip barıwıda a’hmiyetli. A’ne sonda g’ana ilim rawajlanadı»-deydi, Opavadag’ı Sileziya Universiteti doktarantı Tursınbay Uteev.
Inglis tilinde fizika pa’ninen ta’lim alıp atırg’an student jaslar doktaranttan ko’plegen mag’lıwmatlarg’a iye bolmaqta. A’lbette bunday ta’jiriybe almasıwlar jaӊa innovatsiyalıq, ilimiy jaӊalıqlardı jaratıwda tiykar bolıwı so’zsiz.
Mag’lıwmat ushın, Tursınbay Uteev O’zbekstan Milliy universiteti «Fizika» fakulteti bakalavr ha’m magistratura ta’lim bag’darların tamamlag’an.Student waqtında O’zbekstanRespublikası Ilimler Akademiyası Astronomiya institutı ha’m Xalıqaralıq quyash institutında, jumıs islegen. Bu’gingi ku’nde Opavadag’ı Sileziya universiteti doktarantı. Ol Astrofizika iliminde “Black hole”(Qara qurım) bag’darında ilimiy jumıs alıp barmaqta.
