Imkaniyatı sheklengen student-jaslar ushın "Saxovat" mobil qosımshasınıń prezentaciyası ótkerildi
Búgin Nókis mámleketlik texnika universiteti "Kompyuter ilimleri" fakulteti mayıplıǵı bolǵan student-jaslardı qollap-quwatlaw, olardıń sociallıq belsendiligin arttırıw maqsetinde jıynalıs bolıp ótti. Ilajdı fakultet Jaslar máseleleri boyınsha dekan orınbasarı Sh.Baymuratov ashıp berdi. Ol óz sózinde universitette inklyuziv bilimlendiriwge qaratılıp atırǵan itibar, mayıplıǵı bolǵan studentler ushın jaratılıp atırǵan sharayatlar hám olardı qollap-quwatlaw baǵdarındaǵı jumıslar haqqında aytıp ótti.
Usı ilaj sheńberinde "Kompyuter ilimleri" fakulteti 3-kurs studentleri N.Yusupov hám A.Masharipov tárepinen islep shıǵılǵan "Saxovat" atamasındaǵı mobil qosımshasınıń prezentaciyası bolıp ótti. Bul qosımsha jámiyette miyrim-shápáát, saqawat, óz-ara járdem hám adamgershilik ideyaların úgit-násiyatlawǵa xızmet etedi. Baǵdarlama arqalı járdemge mútáj insanlar ózleriniń mútájliklerin bildiriwi, basqa paydalanıwshılar bolsa olarǵa járdem kórsetiwi múmkin.
Studentler mobil qosımshanıń jaratılıw procesi, funkcional imkaniyatları hám paydalanıwshılar ushın qanday qolaylıqlar jaratatuǵını haqqında tolıq maǵlıwmat berdi. Sonday-aq, baǵdarlama keleshekte jáne de rawajlandırılıwı, jańa imkaniyatlar menen tolıqtırılıwı rejelestirilip atırǵanın aytıp ótti.